Xulian Alvares kamida yanvar oyiga qadar "Atletiko"da qoladi. AS ma’lumotiga ko‘ra, qishki transfer oynasida "Barselona" va boshqa klublar argentinalik hujumchiga qiziqishni yana kuchaytirishi mumkin.

Yozgi transfer oynasi Alvares uchun ancha murakkab o‘tdi. Futbolchi "Barselona"ga o‘tish istagini yashirmagan, ammo "Atletiko" uni sotishdan bosh tortgan.

Xabarlarga ko‘ra, Madrid klubi hujumchi uchun 100 million yevrodan ortiq miqdordagi bir nechta taklifni ham rad etgan.

"Barselona" esa Alvaresga bo‘lgan qiziqishini saqlab qolmoqda va kelgusi transfer oynalaridan birida yana harakat qilishi kutilmoqda.

Hozircha 26 yoshli futbolchining asosiy maqsadi — "Atletiko" muxlislari bilan munosabatlarini yaxshilash. Alvares o‘z o‘yini va gollari orqali ularning ishonchini qayta qozonishni istamoqda.

Argentinalik hujumchi 2024 yilda "Manchester Siti"dan "Atletiko"ga o‘tgan. Uning Madrid klubi bilan amaldagi shartnomasi 2030 yilga qadar mo‘ljallangan.