Bugun, 4 sentyabr kuni O‘zbekiston Superligasining 20-turi doirasida "Bunyodkor" va "Surxon" jamoalari o‘zaro bahs olib boradi. Uchrashuv soat 18:00 da boshlanadi.

Jamoalarning chempionat doirasidagi o‘zaro o‘yinlari tarixida hozirga qadar 15 ta uchrashuv qayd etilgan. Ularda "Bunyodkor" 8 marta g‘alaba qozongan bo‘lsa, "Surxon" 6 ta bahsda ustun kelgan. Faqat bitta uchrashuvda g‘olib aniqlanmagan.

To‘plar nisbatida ham poytaxt klubi ustun — 23:16. "Bunyodkor"ning ushbu raqib ustidan eng yirik g‘alabasi 5:1 hisobida qayd etilgan. "Surxon" esa "qaldirg‘ochlar"ni eng yirik hisobda 3:1 va 2:0 natijalari bilan mag‘lub etgan.

Qizig‘i, jamoalar o‘rtasida durang juda kam kuzatilgan. Yagona durang aynan joriy mavsumning birinchi davrasida qayd etildi. 11 mart kuni Termizda o‘tgan bahsda tomonlar 0:0 hisobida murosa qilgan.