Gabriel Martinelli "Arsenal"ni tark etib, Saudiya Arabistonining "Al-Hilol" klubiga o‘tdi. football.london ma’lumotiga ko‘ra, transfer qiymati 60 mln funtni tashkil etgan.

Bu "Arsenal" tarixida futbolchi sotuvidan olingan eng katta mablag‘ bo‘ldi. Avvalgi rekord Aleks Oksleyd-CHemberlenga tegishli edi — londonliklar uni 35 mln funtga sotgan.

Martinellining "Arsenal"dagi mavqei Jahon chempionatidan keyin pasaygan. Eberechi Eze asosiy tarkib uchun kurashda braziliyalikdan ustunlikka ega bo‘la boshlagan. Manbaga ko‘ra, klub yangi futbolchi topishidan oldinroq Martinellini sotishga qaror qilib bo‘lgan.

"Galatasaroy" 25 yoshli vinger uchun 38 mln funt taklif qilgan, ammo bu "Arsenal" talabiga javob bermagan. Keyinroq muzokaralarga "Al-Hilol" qo‘shilib, londonliklar so‘ragan mablag‘ni to‘lashga rozi bo‘lgan.

Martinellining "Manchester Siti" va "Koventri"ga qarshi o‘yinlar qaydnomasiga kiritilmagani ham muhokamalarga sabab bo‘lgandi. "Arsenal" afsonasi Ian Rayt klubning futbolchiga munosabatini tanqid qilgan.

"Hozir Martinelliga qanday munosabatda bo‘linayotganini ko‘rib, o‘zimni noqulay his qilyapman. U bu jamoa uchun yetarlicha ish qildi va biroz ko‘proq hurmatga loyiq", — degandi Rayt.

Martinelli 2019 yildan buyon "Arsenal" safida 278 ta uchrashuvda maydonga tushib, 62 ta gol urdi. Uning eng sermahsul mavsumi 2022/23 yillarga to‘g‘ri kelib, Premyer-ligada 15 ta gol qayd etgan. O‘tgan mavsumda esa APLda atigi bir marta raqib darvozasini ishg‘ol qildi.

Braziliyalik futbolchi shu hafta Saudiya Arabistonida tibbiy ko‘rikdan o‘tib, "Al-Hilol"ga transferini yakunladi.