Габриэл Мартинелли "Арсенал"ни тарк этиб, Саудия Арабистонининг "Ал-Ҳилол" клубига ўтди. football.london маълумотига кўра, трансфер қиймати 60 млн фунтни ташкил этган.
Бу "Арсенал" тарихида футболчи сотувидан олинган энг катта маблағ бўлди. Аввалги рекорд Алекс Окслейд-Чемберленга тегишли эди — лондонликлар уни 35 млн фунтга сотган.
Мартинеллининг "Арсенал"даги мавқеи Жаҳон чемпионатидан кейин пасайган. Эберечи Эзе асосий таркиб учун курашда бразилияликдан устунликка эга бўла бошлаган. Манбага кўра, клуб янги футболчи топишидан олдинроқ Мартинеллини сотишга қарор қилиб бўлган.
"Галатасарой" 25 ёшли вингер учун 38 млн фунт таклиф қилган, аммо бу "Арсенал" талабига жавоб бермаган. Кейинроқ музокараларга "Ал-Ҳилол" қўшилиб, лондонликлар сўраган маблағни тўлашга рози бўлган.
Мартинеллининг "Манчестер Сити" ва "Ковентри"га қарши ўйинлар қайдномасига киритилмагани ҳам муҳокамаларга сабаб бўлганди. "Арсенал" афсонаси Иан Райт клубнинг футболчига муносабатини танқид қилган.
"Ҳозир Мартинеллига қандай муносабатда бўлинаётганини кўриб, ўзимни ноқулай ҳис қиляпман. У бу жамоа учун етарлича иш қилди ва бироз кўпроқ ҳурматга лойиқ", — деганди Райт.
Мартинелли 2019 йилдан буён "Арсенал" сафида 278 та учрашувда майдонга тушиб, 62 та гол урди. Унинг энг сермаҳсул мавсуми 2022/23 йилларга тўғри келиб, Премьер-лигада 15 та гол қайд этган. Ўтган мавсумда эса АПЛда атиги бир марта рақиб дарвозасини ишғол қилди.
Бразилиялик футболчи шу ҳафта Саудия Арабистонида тиббий кўрикдан ўтиб, "Ал-Ҳилол"га трансферини якунлади.
