«Barselona» bosh murabbiyi Xans-Diter Flik braziliyalik vinger Rafinya Diasning hujumchi pozisiyasidagi o‘yini haqida fikr bildirdi.

«Rafinya o‘z vazifasini juda yaxshi uddalamoqda. U juda yaxshi harakatlanadi va qanotda o‘ynaganidagidek, bo‘sh hududlarga yaxshi ochiladi. U markaziy hujumchi pozisiyasi uchun bizning eng yaxshi variantimiz», — deya Flikning so‘zlarini Barca Universal keltirdi.

Joriy mavsumda 29 yoshli Rafinya Ispaniya chempionatining uchta uchrashuvida ham maydonga tushib, raqiblar darvozasiga 5 ta gol urdi va 1 ta golli uzatma amalga oshirdi.

4-turda «Barselona» safarda «Valensiya»ga qarshi o‘ynaydi.