«Chelsi» «Bornmut» yarim himoyachisi Aleks Skottni sotib olish uchun asosiy da’vogar bo‘lib qolmoqda. Bu haqda TEAMtalk manbalariga tayanib xabar berdi.

Manba ma’lumotiga ko‘ra, «ko‘klar» «Bornmut» bilan shunday kelishuvni ko‘rib chiqishga tayyorki, unga ko‘ra 23 yoshli angliyalik futbolchi 2027 yil yozida London klubi safiga qo‘shilishi mumkin.

«Chelsi» boshqa nomzodlarga ham qiziqish bildirib turganiga qaramay, Skottni asosiy transfer maqsadi sifatida belgilab qo‘ygan.

«Bornmut» yoz davomida yetakchi futbolchilarini sotish niyatida emasligini ma’lum qilib keldi. Skott va Krupi klub saqlab qolishga qat’iy bel bog‘lagan futbolchilar qatorida edi.

Avvalroq «Chelsi» ushbu transfer uchun taxminan 80 million yevro ajratishga tayyor ekani xabar qilingan, ammo bu taklif rad etilgan.

Shu bilan birga, BBC ma’lumotiga ko‘ra, futbolchining o‘zi 2026 yilda «Bornmut» tomonidan taklif qilingan yangi shartnomani imzolashdan bosh tortgan.

2026 yilgi yozgi transfer oynasida Skottga «Arsenal», «Manchester Yunayted», «Tottenxem» va «Manchester Siti» ham qiziqish bildirgan. BBC iyun oyida «Arsenal» ham «Bornmut»dan rad javobini olgani haqida xabar bergan edi.

Skott 2023 yil avgustidan beri «Bornmut» sharafini himoya qilib kelmoqda. Uning amaldagi shartnomasi 2028 yil 30 iyunga qadar mo‘ljallangan.

2025/26 yilgi mavsumda yarim himoyachi 39 ta o‘yinda 4 ta gol urdi va 1 ta golli uzatmani amalga oshirdi.

Transfermarkt portali Aleks Skottning transfer qiymatini 50 million yevroga baholamoqda.