Niderlandiyalik taniqli yarim himoyachi Jorjinyo Veynaldum faoliyatini Saudiya Arabistonining «Al-Ittihod» klubida davom ettiradi.

Saudiya klubi 35 yoshli futbolchini erkin agent sifatida o‘z safiga qo‘shib olganini rasman e’lon qildi. Jurnalist Ben Jeykobs ma’lumotiga ko‘ra, Veynaldum mavsum yakuniga qadar shartnoma imzolagan. Kelishuvni yana bir yilga uzaytirish imkoniyati ham mavjud.

Veynaldum bunga qadar uch yil davomida «Al-Ittifoq» sharafini himoya qildi. Saudiya Arabistoniga ko‘chib o‘tishidan oldin esa u «PSJ», «Roma», «Liverpul», «Nyukasl», PSV va «Feyenoord» kabi klublarda to‘p surgan.

«Al-Ittihod» Saudiya Arabistoni chempionatida 5 turdan so‘ng 11 ochko jamg‘arib, turnir jadvalida 4-o‘rinni egallab turibdi.