«Milan» va «Inter»ning yangi umumiy stadion qurish loyihasi yana kechikish xavfi ostida qoldi.
Football Italia xabariga ko‘ra, Milan shahrida yashovchi fuqarolardan biri «San-Siro» stadioni atrofidagi yer maydonining klublarga berilishi qonuniyligiga e’tiroz bildirib, shahar ma’muriyatini sudga bergan.
Manba ma’lumotiga ko‘ra, da’vo yer maydonining «Milan» va «Inter»ning Stadio San Siro SpA qo‘shma kompaniyasiga topshirilishi bilan bog‘liq. Ushbu bitim 2025 yil 5 noyabr kuni rasman yakunlangan.
Da’vogarning ta’kidlashicha, munisipalitet jarayonni ataylab tezlashtirgan va stadionning 70 yilligiga atigi besh kun qolganida yerni klublarga topshirgan. Chunki shu sanadan keyin «San-Siro» avtomatik ravishda madaniy merosni muhofaza qilish maqomiga ega bo‘lishi va uni sotish yoki buzish taqiqlanishi kerak edi.
«Milan» va «Inter» yangi umumiy stadion qurilishini nihoyat tezlashtirishga umid qilgandi. Biroq yangi sud mojarosi jarayonning cho‘zilishiga va qurilish ishlari boshlanishining yana ortga surilishiga sabab bo‘lishi mumkin.
