Hujumchi Franchesko Pio Espozito «Inter» bilan 2032 yilgacha mo‘ljallangan yangi shartnomaga qo‘l qo‘ydi. 21 yoshli forvard ushbu kelishuvni «ushalgan orzu» deb atadi va klub bildirgan ishonchni oqlash uchun mehnat qilishda davom etishga va’da berdi.
«Men hamisha «Inter»ni o‘z uyim deb bilganman va shartnomani uzaytirishni orzu qilardim. Bu mening o‘sishim uchun mukammal makon, bildirilgan ishonch uchun klubga faqat minnatdorchilik bildiraman».
Futbolchi, shuningdek, jamoa sardori Lautaro Martinesning ta’siri haqida ham to‘xtalib o‘tdi:
«U birinchi kundan beri menga yordam berib keladi, maydonda va maydondan tashqarida maslahatlar beradi. Men uning izidan borishni istayman».
Espozito «Inter» tarbiyalanuvchisi hisoblanadi va yoshlar jamoasidan to asosiy tarkibgacha bo‘lgan yo‘lni bosib o‘tgan.
