"Bavariya" hujumchisi Garri Keyn yoshi va professional faoliyatini uzoq yillar davom ettirish istagi haqida fikr bildirdi. Angliyalik futbolchi yozda 33 yoshni qarshiladi.
"Avval ham aytganman, Messi va Ronaldu 30 yoshdan keyin, hatto 30 yoshning o‘rtalarida ham yanada kuchaygan. Menimcha, hozir o‘zim ham faoliyatimning eng yuqori nuqtasida turibman. Jismonan ham, ruhan ham o‘zimni juda yaxshi his qilyapman.
O‘zimdan doim bu holatni qanday qilib iloji boricha uzoq saqlab qolish mumkin, deb so‘rayman. Albatta, bu abadiy davom etmasligini bilamiz. Ammo Messi, Ronaldu va Modrich kabi futbolchilarning 30 yoshning oxirigacha, hatto 40 yoshdan keyin ham o‘ynayotganini ko‘rsam, menda ham shunga erishish uchun motivasiya paydo bo‘ladi", — dedi Keyn TNT Sports nashriga.
Keynning "Bavariya" bilan amaldagi shartnomasi 2026/27 yilgi mavsum yakuniga qadar mo‘ljallangan.
