Adidas Zidanning brend bilan 30 yillik hamkorligiga bag‘ishlangan va uning afsonaviy faoliyatiga ishora qiluvchi ramziy detallarga boy bo‘lgan Predator butsalarining maxsus, hashamatli versiyasini taqdim etdi.
Zizu — Predator modelining asosiy qiyofasidir. U ushbu butsalarda 1998-yilgi Jahon chempionatida g‘olib chiqqan, 2006-yilgi finalda esa mashhur oltin rangli versiyada maydonga tushgan edi. Yangi modelda zamonaviy texnologiyalar va Zidanning faoliyatidagi eng yorqin sahifalar mujassamlashtirilgan.
Modelning asosiy xususiyatlari va detallari:
Rangi va milliy ramzlar: Butsalar oq va oltin ranglar uyg‘unligida ishlangan. Tashqi tomonidagi ko‘k, oq va qizil elementlar uning Fransiya terma jamoasidagi zafarlariga ishora qiladi.
Shaxsiy logotip: Qaytarma tilchasida Zidanning oltin rangli shaxsiy logotipi tushirilgan. Ushbu logotip dizayni Zizuning 2002-yilgi Chempionlar ligasi finalida urgan mashhur afsonaviy golidan ilhomlanib yaratilgan.
Faoliyat geografiyasi: Tilcha ostidagi elastik tasmalarida Zidanning bosib o‘tgan yo‘li aks etgan. O‘ng butsada uning professional faoliyatida muhim o‘rin tutgan shaharlar, chap butsada esa bo‘lajak afsonaning bolaligi va yoshligi o‘tgan Marsel tumanlari nomlari yozilgan.
Yubiley belgisi: Maxsus "ZZ30" markirovkasi futbolchi va brend o‘rtasidagi 30 yillik hamkorlikni anglatadi.
Ushbu cheklangan miqdordagi oyoq kiyimlar (limited edition) 8 sentyabrdan sotuvga chiqadi. Butsaning taxminiy narxi — 300 yevro atrofida.
