«Vilyarreal» «Deportivo»ga qarshi o‘yindagi mag‘lubiyatni unutib, bor e’tiborini Dortmundning «Borussiya» klubiga qarshi yevrokubok bahsiga qaratdi.

Jamoa bosh murabbiyi Inigo Peres matbuot anjumanida futbolchilar safarda g‘alaba qozonish uchun ruhan tayyor ekanini ta’kidladi. Uning so‘zlariga ko‘ra, raqibning nufuzi yoki La Ligadagi so‘nggi natijalar bu maqsadga ta’sir qilmaydi.

«Mag‘lubiyatdan keyin o‘zingizga kelish zarur va bu tabiiy jarayon. Mag‘lubiyat futbolchilarga og‘ir botadi. Ammo ertangiday uchrashuv oldinda turganida, bor e’tiborni unga qaratish shart», — dedi Peres.

Murabbiy o‘tmishga qarab qolish foydasiz ekanini ham ta’kidladi.

«O‘tgan yili yoki ikki kun oldin sodir bo‘lgan voqealarni bir chetga surishimiz kerak. Bu — yangi tarix va unga shunday munosabatda bo‘lishimiz lozim. Ertaga hammasini yangidan boshlash imkoniyati bor. Bu boshqa uchrashuv va u safarda o‘tadi. Biz uni tahlil qilamiz. Faqat shu o‘yin haqida o‘ylash bizga yordam berishi mumkin».

Peres jamoa hujumdan voz kechmagan holda, himoyada ham mustahkam harakat qilishga intilayotganini aytdi.

«Biz bu yerda g‘alaba qozonmoqchimiz. Hujumda aniq harakat qilish himoyada ishonchli va jips bo‘lishga xalal bermaydi. Hozirgacha bizga aniqlik yetishmadi. Kerakli o‘yin va natijaga erishish uchun murabbiy ishlashda davom etishi kerak».

Inigo Peres Germaniya jamoasining kuchli jihatlariga ham to‘xtaldi.

«Ularda bir necha yildan buyon bir murabbiy va bir xil tizim saqlanib kelmoqda. Ayrim taktik o‘zgarishlarga qaramay, Kovach boshchiligida tahlil qilgan barcha o‘yinlarimizdagi kabi «Borussiya»ni kutyapmiz. Ular o‘z falsafasi va asosiy futbolchilarini saqlab qolgan. Shu bois bizga yaxshi tanish bo‘lgan jamoani ko‘rishni kutmoqdamiz», — dedi murabbiy.