Namibiya futbol federasiyasi prezidenti Robert Joel Shimooshili Rossiya terma jamoasiga qarshi o‘tkaziladigan o‘rtoqlik uchrashuvi haqida fikr bildirdi. Uchrashuv 3 oktyabr kuni Yekaterinburgda bo‘lib o‘tadi.
«Biz Yekaterinburgda Rossiya terma jamoasiga qarshi o‘ynaymiz va barcha yulduz futbolchilarimiz ushbu uchrashuvda ishtirok etadi. Biz uchun Yevropaning kuchli jamoalaridan biri bilan bahs olib borish katta sharaf.
Uchrashuv FIFA bilan rasman kelishilgan. Shu bois uning natijasi terma jamoalar reytingi uchun ochko hisoblashda inobatga olinadi. Bu to‘laqonli xalqaro o‘rtoqlik uchrashuvi bo‘ladi.
Bu o‘yinni o‘tkazish imkoniyatini o‘tgan yili ham muhokama qilgan edik. O‘shanda ham o‘ynashimiz mumkin edi, ammo bir qator holatlar va taqvimning zichligi tufayli uchrashuvni tashkil etishning iloji bo‘lmadi. Oxir-oqibat, bahsni shu yil oktyabrda o‘tkazishga kelishdik.
Ishonamanki, ushbu o‘yin mamlakatlarimiz o‘rtasidagi munosabatlarni yanada mustahkamlaydi», — dedi Shimooshili.
