«Barselona» yarim himoyachisi Pedri klubdagi ilk kunlari haqida gapirib, Lionel Messining unga ko‘rsatgan e’tiborini esladi.
Pedrining aytishicha, u va Fransishku Trinkau yangi jamoaga qo‘shilganida juda tortinchoq bo‘lgani uchun kiyinish xonasiga kirishga uyalib, mashg‘ulot zalida yashirinib yurishgan. Bir kuni Messi ularni ko‘rib qolib, kiyinish xonasiga taklif qilgan va qayerga o‘tirishlarini ko‘rsatgan.
«Bu ishi uchun undan bir umr minnatdor bo‘laman. Leo va Jordi Alba bizga moslashib ketishimizga yordam berishdi. O‘zimni juda erkin his qilardim. Dohiylar bilan o‘ynaganingizda to‘p doimo oyog‘ingizga kerakli tezlikda yetib keladi. Ular hammasini osonlashtiradi», — dedi Pedri.
