O‘zbekiston Superligasining 21-turidan o‘rin olgan "Neftchi" — "Surxon" uchrashuvi yakunlandi. Farg‘onadagi bahsda mezbonlar 2:1 hisobida g‘alaba qozondi.

"Neftchi" 12-daqiqada hisobni ochdi. Alisher Odilovning uzatmasidan keyin Vladimir Yovovich to‘pni darvozaga yo‘lladi.

31-daqiqada farg‘onaliklar penalti tepish huquqini qo‘lga kiritdi. Stipe Perisa imkoniyatdan unumli foydalanib, hisobni 2:0 ko‘rinishiga keltirdi.

Ikkinchi bo‘lim boshlanishi bilan "Surxon" farqni qisqartirdi. 46-daqiqada zaxiradan maydonga tushgan Kamronbek Yusupov 47-daqiqada gol urib, hisobni 2:1 qildi.

64-daqiqada "Neftchi" yana penalti tepish imkoniyatiga ega bo‘ldi. Bu safar Perisa raqib darvozabonini dog‘da qoldira olmadi.

Qolgan vaqtda hisob o‘zgarmadi va "Neftchi" 2:1 hisobidagi g‘alabani saqlab qoldi.