«Sporting» bosh murabbiyi Ruy Borjes Chempionlar ligasi umumiy bosqichida «Galatasaroy» ustidan qozonilgan g‘alabadan so‘ng fikr bildirdi.
«Musobaqani g‘alaba bilan boshlash juda muhim edi. Ayniqsa, jamoamiz yosh ekani va ayrim futbolchilar Chempionlar ligasida ilk bor o‘ynayotganini hisobga olsak.
Muxlislar qo‘llab-quvvatlovini his qilish ham muhim. Bu «Galatasaroy»ga qarshi g‘alabada hal qiluvchi omillardan biri bo‘ldi. Ular birinchi bo‘limda juda yuqori intensivlikda o‘ynadi. Raqib yuqori pressing qilishi va to‘p nazoratini o‘z qo‘liga olishga intilishini bilardik.
Dastlabki 25 daqiqada o‘yinimizni yo‘lga qo‘yish qiyin bo‘ldi, ammo keyin vaziyatni o‘zgartirishga erishdik. Ikkinchi bo‘limda yaxshiroq, faolroq va yakkama-yakka kurashlarda kuchliroq harakat qildik.
Yakunda gollar urdik va «Galatasaroy»ga darvozamiz oldida xavfli vaziyatlar yaratish imkonini bermadik. Jamoaviy o‘yindan mamnunman», — dedi Borjes Sport TV’ga.
