«Santos» jarohat sabab maydonga tusha olmagan Neymarsiz «Atletiko Mineyro»ni 2:0 hisobida mag‘lub etdi.
Shunga qaramay, braziliyalik yulduz uchrashuv vaqtida stadionda bo‘lgani aytilmoqda. Shuningdek, Neymarning «Atletiko Mineyro» muxlislaridan biriga keskin javob qaytargani haqida ma’lumot tarqaldi.
«Hatto tizzam jarohatlangan holatda ham jamoangizdagi har bir futbolchidan yaxshiroqman!» — deya Neymarning so‘zlarini keltiradi The Touchline.
Neymar hamon futbol tarixidagi eng qimmat transfer sohibi bo‘lib turibdi. 2017 yilda «PSJ» braziliyalik hujumchini «Barselona»dan 222 million yevro evaziga sotib olgan edi.
34 yoshli Neymarning «Santos» bilan amaldagi shartnomasi 2026 yil oxiriga qadar mo‘ljallangan.
