Bahorda «Real» ichidagi mojaro haqidagi xabarlar futbol olamini shov-shuvga solgan edi. Federiko Valverde va Orelyen Tchuameni kiyinish xonasida janjallashib qolgan, natijada urugvaylik futbolchiga hatto chok qo‘yishga to‘g‘ri kelgani xabar qilingandi.

Valverdening o‘zi esa mushtlashuv bo‘lmaganini, mojaro vaqtida shunchaki stolga urilib ketganini aytgan. Shunga qaramay, o‘sha paytda «Real» har ikki futbolchini katta miqdorda jarimaga tortgan edi.

«Real»ga yaqin jurnalist Xavyer Erraysning ta’kidlashicha, hozir Valverde va Tchuameni o‘rtasida hech qanday muammo qolmagan.

«Ularning munosabatlari haqida surishtirdim va menga hammasi yaxshi ekanini aytishdi. Jamoaga yaqin insonlardan biri ular yaqin do‘st emasligini, ammo o‘sha mojaroni butunlay ortda qoldirganini aytdi.

Ular professional va yetuk futbolchilar, shu bois boshqa muammo bo‘lmaydi. Ishonchli manbalar Valverde va Tchuameni kelishmovchilikni hal qilganini ma’lum qildi. Menimcha, ularni yana maydonda birga ko‘ramiz», — dedi Errays SER Deportivos efirida.

«Real» seshanba kuni Chempionlar ligasida «Inter»ni 2:1 hisobida mag‘lub etdi.