«Roma» darvozaboni Mile Svilar Chempionlar ligasi umumiy bosqichining birinchi turida «Fenerbaxche»ga qarshi o‘yinda qayd etilgan durangni baholadi. Istanbuldagi uchrashuv 1:1 hisobida yakunlandi.

Brayan Kristante birinchi bo‘limda rimliklarni oldinga olib chiqdi, ammo ikkinchi bo‘lim boshlanganidan ko‘p o‘tmay Archi Braun hisobni tenglashtirdi. Svilar uchrashuv yakunida mezbonlar bosimni kuchaytirgan paytda bir nechta muhim seyvlarni amalga oshirib, «Roma»ning eng yaxshi futbolchilaridan biri bo‘ldi.

«Muriku bilan birga-bir vaziyat eng qiyini bo‘ldi. Ular gol urgan vaziyatda ham xuddi shunday harakat qilishga urindim, ammo afsuski, yuqoriroq pozisiyada qolishga ulgurmadim. Ammo hammasi joyida, biz durangdan mamnunmiz va oldinga harakat qilamiz.

Har doim har ikki jamoa ham gol urishi mumkin degan his bo‘ldi. Bu haqiqiy Chempionlar ligasi o‘yinlari. Biz bu bahsda yaxshiroq o‘ynadik, ammo durang ham bizni qanoatlantiradi. Agar A Seriyadagi dastlabki o‘yinlardagi kabi o‘zimizni ko‘rsatishda davom etsak, ochkolar jamg‘arishimiz mumkin», — qo‘shimcha qildi futbolchi.

14 oktyabr kuni «Roma» musobaqaning ikkinchi turida Madridning «Real» klubini qabul qiladi.