«Arsenal» bosh murabbiyi Mikel Arteta jamoa futbolchilarining «Oltin to‘p» mukofotiga nomzodlar qatoriga kiritilgani haqida fikr bildirdi.

France Football talqiniga ko‘ra, yilning eng yaxshi futbolchisi mukofoti uchun «Arsenal»ning uch vakili — Gabriel Magalyaes, Deklan Rays va Vilyam Saliba da’vogarlik qilmoqda. Artetaning o‘zi esa eng yaxshi murabbiy mukofotiga nomzodlar ro‘yxatiga kiritilgan.

«Bu klub rivojlanishning qaysi bosqichida ekanini, ishlarimiz qay darajada yaxshi ketayotganini ko‘rsatadi. Menimcha, bu, albatta, o‘yinimizda namoyish etayotgan barqarorligimizni ham anglatadi. Individual mukofotlar esa jamoa sifatida ajoyib ishlaganimiz natijasidir. Bu mehnatimiz katta sovrinlarni qo‘lga kiritishga yordam berganini ko‘rish yoqimli. Eng muhimi ham shu», — dedi Arteta.

U eng yaxshi murabbiy mukofotini qo‘lga kiritish-qilmasligi haqida:

«Bu menga bog‘liq emas, ammo nomzodlar ro‘yxatida bo‘lish, albatta, katta sharaf».

Rays «Oltin to‘p»ni olishi kerakmi, degan savolga:

«Men ovoz berishda ishtirok etmayman, shuning uchun buni mutaxassislar ixtiyoriga qoldiraman», — dedi Arteta.