UYEFA ijroiya qo‘mitasi 2026/27 yilgi Millatlar ligasida yuqori ligaga chiqish va quyi ligaga tushish tizimiga o‘zgartishlar kiritdi.

Yangiliklar 2028/29 yilgi mavsumdan kuchga kiradigan yangi formatga o‘tishni ta’minlash maqsadida qabul qilingan. Unga ko‘ra, Millatlar ligasida 4 ta emas, 3 ta liga qoladi.

Yangi formatda har bir liga 6 tadan jamoa ishtirok etadigan 3 ta guruhdan iborat bo‘ladi.

Jamoalar 5 xil raqibga qarshi jami 6 tadan o‘yin o‘tkazadi. Turli savatdagi raqiblar bilan uyda yoki safarda, shuningdek, o‘z savatidagi jamoalardan biriga qarshi ham uyda yoki mehmonda bahs olib boriladi.

C ligasida esa 7 ta jamoadan iborat bitta guruh bo‘ladi. Ushbu guruh boshqalarga nisbatan bir xalqaro oyna oldinroq musobaqani boshlaydi.

Chorak finallar, "to‘rtlik finali" hamda yuqori va quyi liga o‘rtasidagi o‘tish pley-off bahslari saqlab qolinadi.

2026/27 yilgi Millatlar ligasi mavsumi 24 sentyabr kuni start oladi.

Amaldagi chempion — Portugaliya. Ispaniya esa avvalgi musobaqa finalchisi hisoblanadi.

2028/29 yilgi mavsumda A ligasi tarkibi quyidagi jamoalardan shakllantiriladi: A ligasining 8 nafar chorak finalchisi, A ligasida uchinchi o‘rinni egallagan jamoalar orasidan eng yaxshi 2 tasi, B ligasining 4 ta guruh g‘olibi hamda A va B ligalari o‘rtasidagi pley-offda g‘olib chiqqan 4 ta jamoa.