Angliya terma jamoasi bosh murabbiyi Tomas Tuxel JCH-2026ning 1/8 finalida Meksika ustidan qozonilgan g‘alabadan keyingi hissiyotlarini esladi.

Angliyaliklar ikkinchi bo‘limning katta qismini Jarrell Kuansa chetlatilgani sababli bir kishi kam bo‘lib o‘tkazishiga qaramay, Meksikani 3:2 hisobida mag‘lub etgan edi.

«O‘yindan keyin do‘stimga yozdim: «Bu lahzani abadiy o‘zimda saqlab qolish uchun maysadan biroz yeb qo‘ymaganimga afsuslandim». O‘sha paytda aynan shunday his qilgandim. Bu haqiqatan ham o‘ziga xos lahza edi», — deya Tuxelning so‘zlarini BBC keltirdi.

Angliyaning ushbu g‘alabasi Meksika terma jamoasining «Asteka» stadionida o‘tkazgan 90 ta rasmiy o‘yinidagi atigi uchinchi mag‘lubiyati bo‘ldi.

Tuxel shogirdlari JCH-2026da yarim finalgacha yetib borib, Argentinaga mag‘lub bo‘ldi. Keyin esa uchinchi o‘rin uchun bahsda Fransiyani yengdi.

Angliya terma jamoasi keyingi uchrashuvini 26 sentyabr kuni Millatlar ligasining dastlabki turida Ispaniyaga qarshi o‘tkazadi.