«Marsel» mavsumlar oralig‘ida UEFAning moliyaviy sanksiyalari bilan bog‘liq vaziyat sabab 2026/27 yilgi Yevropa ligasida ishtirok etmaslik variantini ham ko‘rib chiqqan. Bu haqda L’Équipe xabar berdi.

Klub turnirda qatnashishning ehtimoliy oqibatlarini baholagan va vaziyat rivoji bo‘yicha turli ssenariylarni muhokama qilgan.

17 iyun kuni UEFAning Klublar moliyaviy nazorati bo‘yicha komissiyasi «Marsel»ni 10 million yevro jarimaga tortgan. Shuningdek, fransuz klubiga yevrokuboklardan bir yilga shartli chetlatish jazosi berilgan.

Qarorga ko‘ra, agar «Marsel» belgilangan moliyaviy talablarni bajarmasa, klub 2027/28 yilgi mavsumda yoki undan keyingi mavsumlarda ishtirok etish huquqini qo‘lga kiritgan taqdirda yevrokuboklardan avtomatik ravishda chetlatilishi mumkin.

Shu sabab bahor oxirida Yevropa ligasini o‘tkazib yuborish ehtimoli klub ichida alohida muhokama qilingan. Yakunda esa «Marsel» musobaqada ishtirok etishga qaror qilgan.