«Марсель» мавсумлар оралиғида УЕФАнинг молиявий санкциялари билан боғлиқ вазият сабаб 2026/27 йилги Европа лигасида иштирок этмаслик вариантини ҳам кўриб чиққан. Бу ҳақда L’Équipe хабар берди.

Клуб турнирда қатнашишнинг эҳтимолий оқибатларини баҳолаган ва вазият ривожи бўйича турли сценарийларни муҳокама қилган.

17 июнь куни УЕФАнинг Клублар молиявий назорати бўйича комиссияси «Марсель»ни 10 миллион евро жаримага тортган. Шунингдек, француз клубига еврокубоклардан бир йилга шартли четлатиш жазоси берилган.

Қарорга кўра, агар «Марсель» белгиланган молиявий талабларни бажармаса, клуб 2027/28 йилги мавсумда ёки ундан кейинги мавсумларда иштирок этиш ҳуқуқини қўлга киритган тақдирда еврокубоклардан автоматик равишда четлатилиши мумкин.

Шу сабаб баҳор охирида Европа лигасини ўтказиб юбориш эҳтимоли клуб ичида алоҳида муҳокама қилинган. Якунда эса «Марсель» мусобақада иштирок этишга қарор қилган.