Meksikaning San-Fransisko-del-Rinkon shahrida havaskor jamoalar o‘rtasidagi futbol uchrashuvi vaqtida qurolli hujum yuz berdi.

13 sentyabr kuni mahalliy vaqt bilan soat 14:30 atrofida o‘yin bo‘lib o‘tayotgan maydonga mototsiklda ikki noma’lum shaxs kirib kelib, futbolchilar va tomoshabinlarga qarata o‘q uzgan. Odamlar vahima ichida stadionni tark etishga uringan.

Mahalliy polisiya ma’lumotlariga ko‘ra, hujum oqibatida bir kishi halok bo‘lgan, yana olti kishi shifoxonaga yotqizilgan. Jarohatlanganlar orasida 12 yoshli o‘smir ham bor. Halok bo‘lgan shaxs fastfud sotuvchisi bo‘lib ishlagan va bo‘sh vaqtlarida havaskor sifatida futbol o‘ynab kelgan 25 yoshli Xulio Sesar ekani ma’lum bo‘ldi.

E’tiborlisi shundaki, Meksika bir necha oy oldin Jahon chempionati o‘yinlariga mezbonlik qilgan va o‘sha vaqtda xavfsizlik choralari eng yuqori darajaga ko‘tarilgan edi. Biroq turnir yakunlangach, futbol maydonlarida qurolli hujumlar yana tez-tez qayd etilmoqda.

Xususan, joriy yilning yanvar oyida Salamanka munisipalitetida yuz bergan shunday hujum oqibatida 11 kishi halok bo‘lgandi. Iyul oyida San-Xuan-de-Rasosda uch kishi, avgust oyida esa boshqa bir uchrashuv vaqtida yana to‘rt kishi otishma qurboniga aylangan.

Mahalliy hokimiyat organlari sport maydonchalarining ko‘pligi sababli barcha tadbirlarda xavfsizlikni to‘liq ta’minlashning imkoni yo‘qligini ta’kidlamoqda. Huquq-tartibot idoralari barcha holatlar yuzasidan tergov harakatlari olib bormoqda.