Yevropa futbol assosiasiyalari ittifoqi (UEFA) prezidenti Aleksander Cheferin Xalqaro futbol federasiyasi (FIFA) rahbari Janni Infantinodan tashkilot to‘plagan zaxira mablag‘larining bir qismini uning 211 ta a’zo assosiasiyasiga yo‘naltirishni talab qildi. Mirror nashri ma’lumotiga ko‘ra, har bir federasiyaga 8,75 million yevrodan to‘lov ajratilishi mumkin.
«FIFA, albatta, moliyaviy jihatdan kuchli bo‘lib qolishi, amaldagi majburiyatlarini bajarishi va zarur miqdordagi zaxirani saqlab turishi kerak. Bizning tahlilimizda bularning barchasi to‘liq hisobga olingan.
Ammo hozirgi vaqtda FIFA to‘plangan zaxiralarida milliardlab dollar mablag‘ga ega. Bu resurslar futbolga tegishli va ular o‘yin hamda uning 211 ta assosiasiyasi manfaatiga xizmat qilish uchun mavjud», — deyiladi Cheferin bayonotida.
UEFA rahbari FIFAning prognoz qilinayotgan ehtiyojlaridan ortiq bo‘lgan zaxira mablag‘larining bir qismi futbolni rivojlantirishga yo‘naltirilishi mumkinligini ham qo‘shimcha qildi.
Iyul oyida Infantino FIFA Forward Enterprise nomli kompaniya tashkil etishni rejalashtirayotgani xabar qilingan edi. Ushbu tuzilma FIFAning erkaklar va ayollar o‘rtasidagi asosiy musobaqalarini nazorat qilishi kerak edi.
FIFA ushbu loyiha 4,2 milliard dollar investisiya jalb qilishi mumkinligini bildirgan. Biroq tashabbus qator futbol tashkilotlari tomonidan tanqid qilindi.
56 yoshli Infantino 2016 yil fevral oyidan buyon FIFAga rahbarlik qilib kelmoqda. Keyinchalik u muqobil nomzodlarsiz yana ikki marta tashkilot prezidenti etib qayta saylangan.
