"Real" hujumchisi Kilian Mbappe La Liganing 7-turidan o‘rin olgan "Atletiko"ga qarshi o‘yinda Nike butsasidagi brend logotipini yashirdi. Avvalroq futbolchi kompaniya bilan hamkorlikni yakunlaganini ma’lum qilgan edi.
Madrid derbisida Mbappe to‘liq oq rangdagi Nike Mercurial butsasida maydonga tushdi. Shu bilan birga, u amerikalik brendning firmaviy logotipini ataylab yopib qo‘ygan.
Bu holat futbolchining Shveysariyaning On brendi bilan hamkorligi rasman e’lon qilingan paytga to‘g‘ri keldi. Mbappe nafaqat kompaniya ambassadoriga aylandi, balki uning aksiyadorlari qatoriga ham qo‘shildi.
On brendi avval asosan triatlon va tennisda tanilgan bo‘lib, jumladan Rodjer Federer bilan hamkorligi orqali mashhurlik qozongan.
Endi kompaniya futboldagi ishtirokini ham kengaytirmoqda. Mbappedan tashqari, sobiq futbolchi Tyerri Anri ham brend jamoasi tarkibiga kirgan bo‘lib, u futbol bo‘yicha direktor lavozimini egallab turibdi.
