"Реал" ҳужумчиси Килиан Мбаппе Ла Лиганинг 7-туридан ўрин олган "Атлетико"га қарши ўйинда Nike бутсасидаги бренд логотипини яширди. Аввалроқ футболчи компания билан ҳамкорликни якунлаганини маълум қилган эди.
Мадрид дербисида Мбаппе тўлиқ оқ рангдаги Nike Mercurial бутсасида майдонга тушди. Шу билан бирга, у америкалик бренднинг фирмавий логотипини атайлаб ёпиб қўйган.
Бу ҳолат футболчининг Швейцариянинг On бренди билан ҳамкорлиги расман эълон қилинган пайтга тўғри келди. Мбаппе нафақат компания амбассадорига айланди, балки унинг акциядорлари қаторига ҳам қўшилди.
On бренди аввал асосан триатлон ва теннисда танилган бўлиб, жумладан Роджер Федерер билан ҳамкорлиги орқали машҳурлик қозонган.
Энди компания футболдаги иштирокини ҳам кенгайтирмоқда. Мбаппедан ташқари, собиқ футболчи Тьерри Анри ҳам бренд жамоаси таркибига кирган бўлиб, у футбол бўйича директор лавозимини эгаллаб турибди.
