O‘zbekiston milliy terma jamoasi futbolchisi Abbosbek Fayzullayev Eronga qarshi 3:1 hisobidagi g‘alabadan so‘ng uchrashuv haqidagi fikrlarini bildirdi.

Fayzullayev avvalo stadionga kelib, jamoani qo‘llab-quvvatlagan muxlislarga minnatdorchilik bildirdi.

"O‘yin oson kechmadi. Muxlislar juda yaxshi atmosfera yaratishdi. Menimcha, bahs ularga ham manzur bo‘ldi. Har ikki jamoada imkoniyatlar bo‘ldi, ayrim paytlarda biz, ba’zi vaziyatlarda esa Eron ustunroq ko‘rindi. Eng muhimi, yakunda g‘alaba qozondik", — dedi u.

Abbosbekning ta’kidlashicha, Eron kabi kuchli raqib ustidan qozonilgan g‘alaba jamoaga qo‘shimcha ishonch beradi.

"Bunday raqiblarni yengish har doim yoqimli. Bu jamoaning ruhini ko‘taradi. Endi Toshkentga qaytamiz va Suriyaga qarshi uchrashuvga tayyorgarlikni boshlaymiz", — dedi Fayzullayev.

U milliy jamoada shakllanayotgan avlodga ham ijobiy baho berdi.

"Hozir terma jamoada yaxshi avlod yig‘ilgan. Ilgari ham kuchli futbolchilar bo‘lgan, balki ularga qaysidir jihatlar yetishmagandir", — deya qo‘shimcha qildi futbolchi.

Fayzullayev yangi taktik sxema o‘ziga ma’qul kelganini ham aytdi.

"O‘zimni yaxshi his qildim. Yangi taktika menga yoqdi. Albatta, to‘p yo‘qotish yoki noto‘g‘ri pas berish kabi holatlar bo‘ladi — bu futbolning bir qismi. Bosh murabbiy esa shu ruhda davom etib, tempni yana oshirish kerakligini aytdi. Osiyo chempionatiga eng yaxshi holatda borishimiz shart", — dedi u.