«Shtutgart» markaziy himoyachisi Finn Yelch faoliyatini Madridning «Real» klubida davom ettirishi mumkin. Bu haqda Diario AS xabar berdi.

Manbaga ko‘ra, «Real» Din Xyoysen va Ibraima Konateni yaqinda o‘z safiga qo‘shib olgan bo‘lsa-da, markaziy himoya chizig‘ini yana kuchaytirish ustida ishlashda davom etmoqda.

Hozircha madridliklarda yangi himoyachiga shoshilinch ehtiyoj yo‘q. Biroq mavsum oxirida Antonio Ryudigerning shartnomasi yakunlanadi, tez-tez jarohat oladigan Eder Militaoning holati esa klubda savollar uyg‘otmoqda.

20 yoshli Yelch joriy mavsumda barcha musobaqalarda 6 ta o‘yinda maydonga tushib, 1 ta golli uzatmani amalga oshirdi.

Transfermarkt ma’lumotiga ko‘ra, himoyachining bozor qiymati 35 million yevroni tashkil qiladi.