FIFA prezidenti Janni Infantino Saudiya Arabistoniga amaliy tashrifi chog‘ida jahon sportining kelajagi haqida fikr bildirdi. U futbol jamoatchiligini o‘zaro hurmat va konstruktiv muloqotga chaqirdi.

«Xatimdan keyin barchadan fikr-mulohaza kutyapman. Dunyoning turli nuqtalaridan allaqachon ijobiy xabarlar oldim. Hozir esa bir-birimizni tinglashni davom ettirish juda muhim. Muloqot va hurmat madaniyati bo‘lishi kerak. Gap matbuotda chiroyli sarlavhalar yaratish haqida emas, balki futbol uchun to‘g‘ri qarorlar qabul qilish haqida ketyapti. Bu masalada hech qachon hozirgidek qat’iy bo‘lmaganman», — dedi Infantino ESPN’ga.

Avvalroq Angliya Premyer-ligasi, Bundesliga, La Liga va A Seriya FIFAda islohotlar o‘tkazishga chaqirgan qo‘shma bayonot bilan chiqqan edi.

FIFA, shuningdek, jahon chempionatining ayrim tijoriy huquqlarini sotish rejalari sabab tanqidlarga uchradi.