Madridning «Real» klubi markaziy himoyachisi Raul Asensio yaqin orada jamoani tark etmaydi. Bu haqda jurnalist Ekrem Konur xabar bermoqda.

Manba ma’lumotlariga ko‘ra, ispaniyalik futbolchiga Premyer-liganing ikki grandi — «Chelsi» va «Liverpul» tomonidan qiziqish bo‘lishiga qaramay, «qaymoqranglilar» Asensio bilan xayrlashish variantini ko‘rib chiqmayapti. Shu bilan birga, himoyachi joriy mavsumda hali biror marta ham maydonga tushgani yo‘q.

Asensio — «Real» tarbiyalanuvchisi. Debyut qilganidan beri u asosiy jamoa tarkibida 80 ta o‘yin o‘tkazib, 2 ta gol urdi va 3 ta golli uzatmaga mualliflik qildi.

Asensioning «Real» bilan amaldagi mehnat shartnomasi 2031 yilning o‘rtalarigacha mo‘ljallangan.