Мадриднинг «Реал» клуби марказий ҳимоячиси Рауль Асенсио яқин орада жамоани тарк этмайди. Бу ҳақда журналист Экрем Конур хабар бермоқда.

Манба маълумотларига кўра, испаниялик футболчига Премьер-лиганинг икки гранди — «Челси» ва «Ливерпуль» томонидан қизиқиш бўлишига қарамай, «қаймоқранглилар» Асенсио билан хайрлашиш вариантини кўриб чиқмаяпти. Шу билан бирга, ҳимоячи жорий мавсумда ҳали бирор марта ҳам майдонга тушгани йўқ.

Асенсио — «Реал» тарбияланувчиси. Дебют қилганидан бери у асосий жамоа таркибида 80 та ўйин ўтказиб, 2 та гол урди ва 3 та голли узатмага муаллифлик қилди.

Асенсионинг «Реал» билан амалдаги меҳнат шартномаси 2031 йилнинг ўрталаригача мўлжалланган.