Rafinya Braziliya terma jamoasining Avstraliyaga qarshi seshanba kungi uchrashuvida almashtirildi. Futbolchining maydonni tark etishi jarohat bilan bog‘liq bo‘lib, u mushaklarida noqulaylik his qilgan.

Endi «Barselona»da jamoa yetakchilaridan biri ma’lum muddatga safdan chiqishidan xavotir bor. Bu kataloniyaliklar uchun jiddiy yo‘qotish bo‘lishi mumkin, chunki Rafinya mavsum boshida ajoyib forma namoyish etmoqda — u 8 ta o‘yinda 14 ta gol urgan.

Qizig‘i, ijtimoiy tarmoqlarda muxlislar Braziliya terma jamoasi bosh murabbiyi Karlo Anchelottini tanqid qila boshladi. «Barselona» muxlislarining ayrimlari mutaxassis o‘zining sobiq klubi — «Real»ga yordam berayotganini iddao qilmoqda.

Misol sifatida Vinisius keltirilmoqda. «Real» hujumchisi o‘tgan hafta Braziliyaning birinchi o‘yinida 65 daqiqa harakat qilgan. Rafinya esa o‘sha bahsni to‘liq o‘tkazgan, Avstraliyaga qarshi uchrashuvni ham asosiy tarkibda boshlagan va faqat jarohat olganidan keyin tanaffusda almashtirilgan.