«Xall Siti» egasi Akun Ilijali Angliya Premyer-ligasi klublari rahbarlari orasida birinchi bo‘lib «Manchester Siti»ga qo‘yilgan 114 ta moliyaviy qoidabuzarlik bo‘yicha ayblovlarga ochiq munosabat bildirdi. Avvalroq manchesterliklarga turli sanksiyalar, jumladan, APLdan chetlatish jazosi ham qo‘llanilishi mumkinligi xabar qilingan edi.

«Ular aybdormi yoki yo‘qmi, bu haqda hukm chiqarishni o‘z zimmamga olmayman. Chunki klubning o‘zi aybsiz ekanini ta’kidlamoqda. Men tushunganimcha, Premyer-liga bu masalada boshqacha fikrda.

Agar ular haqiqatan ham aybdor bo‘lsa va qoidalarni buzgani isbotlansa, menimcha, bu sportchining doping yordamida Olimpiya medalini qo‘lga kiritishidan deyarli farq qilmaydi.

Aslida, bu — moliyaviy doping. Ya’ni qoidalarni buzgan holda katta mablag‘lar evaziga eng kuchli futbolchilarni jalb qilish», — deya Ilijalining so‘zlarini The Touchline keltirdi.