«Халл Сити» эгаси Акун Илижали Англия Премьер-лигаси клублари раҳбарлари орасида биринчи бўлиб «Манчестер Сити»га қўйилган 114 та молиявий қоидабузарлик бўйича айбловларга очиқ муносабат билдирди. Аввалроқ манчестерликларга турли санкциялар, жумладан, АПЛдан четлатиш жазоси ҳам қўлланилиши мумкинлиги хабар қилинган эди.
«Улар айбдорми ёки йўқми, бу ҳақда ҳукм чиқаришни ўз зиммамга олмайман. Чунки клубнинг ўзи айбсиз эканини таъкидламоқда. Мен тушунганимча, Премьер-лига бу масалада бошқача фикрда.
Агар улар ҳақиқатан ҳам айбдор бўлса ва қоидаларни бузгани исботланса, менимча, бу спортчининг допинг ёрдамида Олимпия медалини қўлга киритишидан деярли фарқ қилмайди.
Аслида, бу — молиявий допинг. Яъни қоидаларни бузган ҳолда катта маблағлар эвазига энг кучли футболчиларни жалб қилиш», — дея Илижалининг сўзларини The Touchline келтирди.
