Financial Times xabariga ko‘ra, «Manchester Siti»ning Angliya Premyer-ligasidagi davom etayotgan ishi kengroq siyosiy ahamiyat kasb etmoqda. Ish bo‘yicha chiqarilishi mumkin bo‘lgan qarorlar Buyuk Britaniya va BAA o‘rtasidagi munosabatlarga salbiy ta’sir ko‘rsatishi ehtimoli bor.

Bunga klub raisi Haldun Al Muborakning Buyuk Britaniyadagi 30 milliard funtlik majburiyatlarni o‘z ichiga olgan suveren investisiya hamkorligini nazorat qilishi ham sabab bo‘lmoqda.

Al Muborak 2020 yildan buyon Buyuk Britaniyada diplomatik daxlsizlik maqomiga ega. Ushbu maqom uni jinoiy ta’qibdan, shuningdek, aksariyat holatlarda mamlakatdagi fuqarolik da’volaridan himoya qiladi.

Buyuk Britaniya Qirollik prokuratura xizmatida ekstradisiya masalalari bo‘yicha sobiq rahbar Nik Vamosning tushuntirishicha, Al Muborak «jinoiy ta’qibdan to‘liq himoyalangan va o‘zining «rasmiy vazifalari» bilan bog‘liq fuqarolik da’volari bo‘yicha daxlsizlikka ega».

Shu sababli «Manchester Siti» ishidan keyin Al Muborakning o‘ziga nisbatan Buyuk Britaniya sudlari orqali qandaydir huquqiy chora ko‘rishga urinish jiddiy to‘siqlarga duch kelishi mumkin.

Financial Times nashri Al Muborakning shaxsan qonunbuzarlik qilgani haqida hech qanday da’vo yo‘qligini alohida ta’kidlagan. Biroq uning maqomi bilan bog‘liq diplomatik nozikliklar Angliya futbolining eng boy klublaridan biri uchun allaqachon katta ahamiyat kasb etayotgan ushbu ishga yana bir murakkab jihat qo‘shmoqda.