Braziliyalik sobiq futbolchi Aleshandre Pato hozirgi "Milan" tarkibida qaysi futbolchi unga eng ko‘p yoqishini aytdi.

Sobiq hujumchi terma jamoalar tanaffusi oldidan joriy mavsumdagi ilk golini urgan Kristian Pulishichni alohida ta’kidladi.

"Hozirgi "Milan"da menga Pulishich juda yoqadi. U to‘pni so‘rash va o‘yinni o‘z zimmasiga olish uchun yetarlicha jasur, golli vaziyatlarda doim ishtirok etadi. Yaqinda jarohatdan qaytdi va hozir yana o‘z tanasiga ishonch bilan harakat qilmoqda. U "Milan"ni yana yuqori cho‘qqiga olib chiqishiga umid qilaman. Biz Chempionlar ligasiga yo‘llanma olishimiz kerak", — deya Patoning so‘zlarini Milan Posts keltirdi.

Kristian Pulishich 2023 yil yozidan beri "rossoneri" sharafini himoya qilib kelmoqda. Amerikalik futbolchi 18 sentyabr kuni 28 yoshga to‘ldi.