Angliya terma jamoasi hujumchisi Bukayo Saka Xorvatiyaga qarshi 7:0 hisobida yakunlangan uchrashuvda yarim himoyachi Jud Bellingemning o‘yinini yuqori baholadi. UYEFA Millatlar ligasi uchinchi turi doirasida o‘tgan bahsda Bellingem bitta gol urdi va uchta golli uzatmani amalga oshirdi.
"U ajoyib o‘ynadi. U Angliya terma jamoasida yilning eng yaxshi futbolchisi unvoniga munosib edi va, ehtimol, bugun ham uchrashuvning eng yaxshi o‘yinchisi bo‘lishga loyiq edi. U alohida futbolchi. U bilan birga o‘ynayotganimdan va Angliya terma jamoasida shunday futbolchi borligidan xursandman", — deya Sakaning so‘zlarini BBC keltirdi.
Guruhdan chiqish uchun kurash haqida gapirar ekan, futbolchi qo‘shimcha qildi:
"Oldinda yana uchta o‘yin bor, ammo bu g‘alaba bizga, albatta, katta ishonch va kuchli turtki beradi".
Ispaniya va Angliya hisobida 6 tadan ochko bor. Xorvatiya 3 ochko jamg‘argan, Chexiya esa hozircha ochko olmagan. Ispaniya va Chexiya bugun o‘zaro maydonga tushadi. To‘rtinchi turda Angliya 6 oktyabr kuni Chexiyaga qarshi o‘ynaydi.
