Англия терма жамоаси ҳужумчиси Букайо Сака Хорватияга қарши 7:0 ҳисобида якунланган учрашувда ярим ҳимоячи Жуд Беллингемнинг ўйинини юқори баҳолади. УЕФА Миллатлар лигаси учинчи тури доирасида ўтган баҳсда Беллингем битта гол урди ва учта голли узатмани амалга оширди.

"У ажойиб ўйнади. У Англия терма жамоасида йилнинг энг яхши футболчиси унвонига муносиб эди ва, эҳтимол, бугун ҳам учрашувнинг энг яхши ўйинчиси бўлишга лойиқ эди. У алоҳида футболчи. У билан бирга ўйнаётганимдан ва Англия терма жамоасида шундай футболчи борлигидан хурсандман", — дея Саканинг сўзларини BBC келтирди.

Гуруҳдан чиқиш учун кураш ҳақида гапирар экан, футболчи қўшимча қилди:

"Олдинда яна учта ўйин бор, аммо бу ғалаба бизга, албатта, катта ишонч ва кучли туртки беради".

Испания ва Англия ҳисобида 6 тадан очко бор. Хорватия 3 очко жамғарган, Чехия эса ҳозирча очко олмаган. Испания ва Чехия бугун ўзаро майдонга тушади. Тўртинчи турда Англия 6 октябрь куни Чехияга қарши ўйнайди.