Portugaliya terma jamoasi yarim himoyachisi Brunu Fernandesh Daniya terma jamoasi hujumchisi Rasmus Xoylundning Portugaliya darvozasiga urgan golidan keyin Krishtianu Ronaldu uslubida nishonlagani haqida fikr bildirdi.

«Men uning golni qanday nishonlaganini ko‘rdim, ammo u buni avval ham ko‘p marta qilgan. U Krishtianuning katta muxlisi ekanini bilaman. U bizga qarshi Krish maydonda bo‘lgan paytda ham shunday nishonlagan. O‘shanda u Krishtianuga yomon ta’sir qilmadimikan, deb juda xavotirlanganini eslayman.

Xoylund ham Krishtianu Ronalduni kuzatib ulg‘aygan yosh futbolchilardan biri. Portugaliya terma jamoasidagi ko‘pchiligimiz kabi u ham Krishtianuga havas qiladi. U Krishtianu Ronalduni juda yaxshi ko‘radi va uning qilgan ishlariga taqlid qilishga harakat qiladi.

Oxir-oqibat, uning golni nishonlash uslubi futbol tarixidagi eng mashhurlaridan biri. Biz uni keyingi 30, 50 yoki 60 yil davomida qanday takrorlanishini ko‘ramiz. Ronaldu — futbolda alohida o‘ringa ega bo‘lgan buyuk shaxs va ikona», — dedi Fernandesh BeanymanSports’ning X ijtimoiy tarmog‘idagi sahifasida e’lon qilingan videoda.