"Liverpul" darvozaboni Alisson Beker katta ehtimol bilan "Enfild"dagi so‘nggi mavsumini o‘tkazmoqda.

Insayder Fabrisio Romano ma’lumotiga ko‘ra, klub rahbariyati futbolchi bilan yangi shartnoma bo‘yicha muzokara olib bormayapti. Amaldagi kelishuv esa kelasi yozda o‘z nihoyasiga yetadi.

Qayd etilishicha, Alissonning hozirgi shartnomasida hamkorlikni avtomatik tarzda davom ettirish imkonini beruvchi hech qanday band yo‘q. Shu sababli, agar "Liverpul" fikrini o‘zgartirib, futbolchini jamoada saqlab qolishni istasa, tomonlar yangi shartnoma bo‘yicha kelishib olishiga to‘g‘ri keladi.

Manba, shuningdek, avvalroq Alissonga "Yuventus" qiziqish bildirganini ta’kidladi. Turin klubi braziliyalik darvozabon uchun yana kurashga qo‘shilishi mumkin.

Joriy mavsumda 34 yoshli Alisson barcha musobaqalar doirasida 6 ta uchrashuvda maydonga tushib, 5 ta gol o‘tkazib yubordi. U 3 ta o‘yinda o‘z darvozasi daxlsizligini saqlab qolishga muvaffaq bo‘ldi.