"Bavariya" "Manchester Yunayted" futbolchisi Jey-Jey Gabrielga jiddiy qiziqish bildirmoqda. Sky Sport ma’lumotiga ko‘ra, Germaniya klubi vakillari 16 yoshli futbolchining atrofidagi shaxslar bilan uchrashuv o‘tkazib bo‘lgan va yana bir muzokara o‘tkazishga kelishib olgan.

Gabriel Yevropada o‘z avlodining eng istiqbolli iqtidorlaridan biri hisoblanadi va "Manchester Yunayted"ni tark etishni rejalashtirmoqda. Angliya klubi esa uni jamoada qolishga ko‘ndirishga harakat qilyapti.

Gabriel hali professional shartnoma imzolamagani sababli, uning boshqa klubga o‘tishi uchun faqat futbolchini tayyorlaganlik bo‘yicha kompensasiya to‘lanishi mumkin.

Avvalroq futbolchining vakillari "Manchester Yunayted"dan Gabrielga asosiy jamoaning yaqin uchrashuvlarida o‘yin amaliyoti berishni talab qilgani ma’lum bo‘lgan edi.