Olimpiada chempioni Nodirbek Abdusattorov yuqori darajadagi shaxmatda psixologik barqarorlik qanchalik muhim ekanini ta’kidladi.

“Partiyadan keyingi salbiy fikrlarni ortda qoldirish kerak. O‘yin davomida esa butun diqqat doska va pozisiyada bo‘lishi kerak. Bunday fikrlar chalg‘itadi va energiyani ham olib qo‘yadi.”

Uning aytishicha, shaxmatda ko‘plab xatolar hissiyotlar va psixologik bosim tufayli yuz beradi.

“Men shuni tushundimki, ko‘p ochkolar aynan shunday holatlarda yo‘qotiladi. Vaqt o‘tishi bilan yuqori bosimli vaziyatlarda o‘zimni yaxshiroq nazorat qila boshladim”, dedi Nodir Abdusattorov.

Shuningdek, u elit shaxmatda natijani ko‘pincha juda kichik detallar hal qilishini ham aytib o‘tdi.

“Eng yuqori darajada juda kichik jihatlar ham o‘yin natijasini belgilashi mumkin. Agar shu mayda tomonlarni yaxshilasangiz, umumiy o‘yiningiz ham ancha kuchayadi”.

Eslatib o‘tamiz, Samarqandda bo‘lib o‘tgan 46-Butun jahon shaxmat olimpiadasida O‘zbekiston terma jamoasi g‘olib bo‘ldi.

O‘zbekiston musobaqaning dastlabki yetti turining barchasida g‘alaba qozondi. Hal qiluvchi bahslarda Hindiston 2,5:1,5, Xitoy esa 3:1 hisobida mag‘lub etildi. 8-turda Germaniya O‘zbekistonning g‘alabali seriyasiga barham berdi. Shundan so‘ng terma jamoa 9-turda turnirning birinchi raqamli saralangan jamoasi AQSHni mag‘lub etdi. 10-turda esa Armaniston 3,5:0,5 hisobida taslim etildi.

Ukrainaga qarshi so‘nggi turdagi bahs esa chempionlik masalasini uzil-kesil hal qildi.

Terma jamoa a’zosi Nodirbek Abdusattorov 1-taxtacha bo‘yicha eng yaxshi natija qayd etib, individual oltin medalni ham qo‘lga kiritdi.