"Manchester Siti" hujumchisi Erling Xolandning "Barselona"ga o‘tishi "Arsenal"ning Madrid "Atletiko"si futbolchisi Xulian Alvaresni xarid qilish imkoniyatini oshirishi mumkin. Bu haqda TEAMtalk xabar bermoqda.

Manba ma’lumotiga ko‘ra, "Barselona" hamon argentinalik hujumchiga qiziqish bildirmoqda. Biroq kataloniyaliklarda boshqa variantlar ham paydo bo‘lgan, ular orasida Erling Xoland ham bor.

Xabar qilinishicha, "Manchester Siti" moliyaviy qoidalarni buzganlik bo‘yicha ayblovlar ortidan Xolandni yo‘qotishi mumkin. Agar norvegiyalik hujumchi "Barselona"ga o‘tsa, kataloniyaliklarning Alvaresni ham xarid qilish imkoniyati deyarli qolmaydi.

So‘nggi haftalarda Alvaresning vakillari futbolchining kelajagini batafsil muhokama qilgan. Jumladan, agar u "Atletiko"ni tark etishga qaror qilsa, uning yuqori maqsadlariga mos keladigan klublar soni cheklangani ham ko‘rib chiqilgan.

Shunday klublar qatoriga "Arsenal" ham kiradi. Londonliklar o‘tgan yozda ham argentinalik hujumchini o‘z safiga qo‘shib olishga harakat qilgan edi.