Madridning «Real» klubi «Manchester Siti» hujumchisi Erling Xolandni sotib olish uchun kurashda «Barselona»ga nisbatan muhim ustunlikka ega bo‘lishi mumkin.
So‘nggi vaqtlarda norvegiyalik futbolchining Ispaniya chempionatiga ko‘chib o‘tishi haqida turli xabarlar tarqalmoqda. Xususan, «Barselona» Xolandning ehtimoliy transferi va shaxsiy shartnomasi shartlarini o‘rganishga kirishgani aytilmoqda.
Biroq kataloniyaliklar uchun 2027 yilda bunday yirik transferni amalga oshirish oson kechmasligi mumkin.
El Nacional nashrining ta’kidlashicha, «Barselona» prezidenti Joan Laporta futbolchini qo‘lga kiritish uchun muzokaralarni faollashtirishi mumkin. Ammo klubning moliyaviy imkoniyatlari asosiy to‘siq bo‘lib qolmoqda.
«Joan Laporta muzokaralarni oldinga siljitishi va transfer uchun zamin yaratishi mumkin. Biroq futbolchini ro‘yxatdan o‘tkazish imkoniyati bo‘lmasa, qolgan barcha harakatlarning ahamiyati kamayadi», — deb yozadi nashr.
Gap shundaki, Xolandni sotib olish nafaqat «Manchester Siti»ga katta miqdorda transfer puli to‘lashni, balki futbolchining shaxsiy shartnomasi uchun ham jiddiy mablag‘ ajratishni talab etadi.
«Barselona»ning moliyaviy holati esa bunday xarajatlarni qoplash va futbolchini La Liga talablariga muvofiq ro‘yxatdan o‘tkazishda qiyinchilik tug‘dirishi mumkin.
«Real» esa bu borada raqibiga nisbatan qulayroq vaziyatda.
«Madrid klubining moliyaviy tuzilmasi bunday darajadagi shartnomani amalga oshirishga yaxshiroq tayyorlangan. Buning uchun «Real» «Barselona» kabi oldindan ko‘plab moliyaviy choralarni ko‘rishi shart emas.
Aynan shu jihat «Barselona» rahbariyatini xavotirga solmoqda. Laporta Xoland bilan kelishuvga erishishga yaqinlashishi mumkin, biroq maoshlar bo‘yicha cheklovlar futbolchini ro‘yxatdan o‘tkazishni imkonsiz qilib qo‘yishi ehtimoldan xoli emas», — deyiladi El Nacional materialida.
Shu tariqa, agar norvegiyalik hujumchi Ispaniyaga ko‘chib o‘tishga qaror qilsa, «Real»ning moliyaviy imkoniyatlari transfer taqdirida hal qiluvchi omilga aylanishi mumkin.
Eslatib o‘tamiz, Erling Xolandning «Manchester Siti» bilan amaldagi shartnomasi 2034 yilning yoziga qadar mo‘ljallangan.
