Мадриднинг «Реал» клуби «Манчестер Сити» ҳужумчиси Эрлинг Холандни сотиб олиш учун курашда «Барселона»га нисбатан муҳим устунликка эга бўлиши мумкин.

Сўнгги вақтларда норвегиялик футболчининг Испания чемпионатига кўчиб ўтиши ҳақида турли хабарлар тарқалмоқда. Хусусан, «Барселона» Холанднинг эҳтимолий трансфери ва шахсий шартномаси шартларини ўрганишга киришгани айтилмоқда.

Бироқ каталонияликлар учун 2027 йилда бундай йирик трансферни амалга ошириш осон кечмаслиги мумкин.

El Nacional нашрининг таъкидлашича, «Барселона» президенти Жоан Лапорта футболчини қўлга киритиш учун музокараларни фаоллаштириши мумкин. Аммо клубнинг молиявий имкониятлари асосий тўсиқ бўлиб қолмоқда.

«Жоан Лапорта музокараларни олдинга силжитиши ва трансфер учун замин яратиши мумкин. Бироқ футболчини рўйхатдан ўтказиш имконияти бўлмаса, қолган барча ҳаракатларнинг аҳамияти камаяди», — деб ёзади нашр.

Гап шундаки, Холандни сотиб олиш нафақат «Манчестер Сити»га катта миқдорда трансфер пули тўлашни, балки футболчининг шахсий шартномаси учун ҳам жиддий маблағ ажратишни талаб этади.

«Барселона»нинг молиявий ҳолати эса бундай харажатларни қоплаш ва футболчини Ла Лига талабларига мувофиқ рўйхатдан ўтказишда қийинчилик туғдириши мумкин.

«Реал» эса бу борада рақибига нисбатан қулайроқ вазиятда.

«Мадрид клубининг молиявий тузилмаси бундай даражадаги шартномани амалга оширишга яхшироқ тайёрланган. Бунинг учун «Реал» «Барселона» каби олдиндан кўплаб молиявий чораларни кўриши шарт эмас.

Айнан шу жиҳат «Барселона» раҳбариятини хавотирга солмоқда. Лапорта Холанд билан келишувга эришишга яқинлашиши мумкин, бироқ маошлар бўйича чекловлар футболчини рўйхатдан ўтказишни имконсиз қилиб қўйиши эҳтимолдан холи эмас», — дейилади El Nacional материалида.

Шу тариқа, агар норвегиялик ҳужумчи Испанияга кўчиб ўтишга қарор қилса, «Реал»нинг молиявий имкониятлари трансфер тақдирида ҳал қилувчи омилга айланиши мумкин.

Эслатиб ўтамиз, Эрлинг Холанднинг «Манчестер Сити» билан амалдаги шартномаси 2034 йилнинг ёзига қадар мўлжалланган.