Londonning «Arsenal» klubi hujumchisi Kay Xavers yaqin haftalar ichida jarohatidan tuzalib, maydonga qaytishi mumkin.
Germaniyalik futbolchi milliy terma jamoa ixtiyorida bo‘lgan vaqtida jarohat olgan edi. Hozircha uning tiklanish muddati borasida rasmiy ma’lumot berilmagan bo‘lsa-da, dastlabki taxminlar ijobiy.
Jarohatlar bo‘yicha mutaxassis Stiven Smit Metro nashriga bergan intervyusida Xaversning holati yuzasidan o‘z fikrlarini bildirdi.
«Katta ehtimol bilan, uning holatida mushaklarning yengil cho‘zilishi haqida gap ketmoqda. Agar shunday bo‘lsa, tiklanish jarayoni ikki haftadan to‘rt haftagacha davom etadi», — dedi mutaxassis.
Shu tariqa, agar jarohatning yengil darajada ekani tasdiqlansa, Xavers oktyabr oyining ikkinchi yarmi yoki noyabr boshlarida maydonga qaytishi mumkin.
Ma’lumot uchun, Kay Xavers joriy mavsumda «Arsenal» safida barcha musobaqalar doirasida yettita uchrashuvda ishtirok etib, uchta gol urgan.
Mikel Arteta shogirdlari navbatdagi uchrashuvini 10 oktyabr, shanba kuni Angliya Premyer-ligasining 6-turi doirasida «Lids»ga qarshi o‘tkazadi.
London klubi o‘z maydonida bo‘lib o‘tadigan mazkur bahsni Toshkent vaqti bilan soat 16:30 da boshlaydi.
