Hujumchi Kilian Mbappening aksariyat jamoadoshlari bilan munosabatlari asosan professional xarakterga ega. Bu haqda OK Diario ma’lumotlariga tayangan holda The Touchline xabar berdi.
Qayd etilishicha, Kilian Mbappe va Vinisius Junior jamoatchilikka yaqin do‘stlardek ko‘rinsa-da, aslida do‘st emas. Manbaga ko‘ra, ularning munosabatlari asosan professional doirada qolmoqda va har ikki futbolchi ham bir-biri bilan yanada yaqinlashishga alohida intilayotgani yo‘q.
«Ularning munosabatlari asosan professional xarakterga ega. Ularning hech biri ayniqsa yaqinlashishga intilmayapti», — deydi manba.
Shuningdek, Jud Bellingem bilan ham ma’lum darajada taranglik borligi aytilmoqda. Avvalroq angliyalik futbolchi Mbappe va Vinisiusning ayrim xatti-harakatlaridan norozi bo‘lgani xabar qilingan. «Real» rahbariyati esa Bellingemdan sabrli bo‘lish va ayrim vaziyatlarga katta ahamiyat bermaslikni so‘ragan.
«Real» jamoadagi taranglikni kamaytirish va asosiy yulduzlar o‘rtasidagi kelishmovchiliklarga qaramay, ularning birgalikda samarali ishlashini ta’minlashga harakat qilmoqda.
