Londonning «Chelsi» klubi yarim himoyachisi Morgan Rojers yangi jamoasidagi faoliyati boshlanishini 10 ballik tizimda eng yuqori bahoga munosib deb hisoblashini ma’lum qildi.
Garchi «Chelsi» so‘nggi uchrashuvlarda barqaror natijalar ko‘rsata olmayotgan bo‘lsa-da, 24 yoshli futbolchi o‘zining shaxsiy o‘yini va jamoaga qo‘shayotgan hissasidan to‘liq mamnun.
Xabi Alonso boshchiligidagi «Chelsi» xalqaro o‘yinlar uchun ajratilgan tanaffusga ketma-ket uchta uchrashuvda g‘alaba qozona olmagan holda yo‘l oldi. Londonliklar ayni paytda Angliya Premyer-ligasi turnir jadvalida 10-o‘rinni egallab turibdi.
Biroq yozda «Aston Villa»dan Britaniya futboli uchun rekord hisoblangan 117 million funt sterling evaziga xarid qilingan Rodjers mavsumni individual jihatdan muvaffaqiyatli boshladi.
Futbolchi The Standard nashriga bergan intervyusida o‘zining hozirgi holati va maydondagi natijalari haqida gapirdi.
«10 ball. Men bu davrdan zavq olyapman. O‘zimni faoliyatim davomidagi eng yaxshi holatda his qilyapman.
Muntazam maydonga tushyapman, jamoamga foyda keltiryapman, gollar uryapman, golli uzatmalar amalga oshiryapman va xavfli vaziyatlar yaratyapman.
Faoliyatim davomida hech qachon bundan yaxshiroq o‘ynamaganman. Shunday ekan, nega o‘zimga 10 ball qo‘ymasligim kerak?» — dedi Rojers.
Ma’lumot uchun, 24 yoshli yarim himoyachi joriy mavsumda «Chelsi» safida Angliya Premyer-ligasining beshta uchrashuvida ishtirok etib, uchta gol urdi va bitta golli uzatmani amalga oshirdi.
Ayni paytda London klubida gol va golli uzatmalarning umumiy soni bo‘yicha Rojersdan faqat uning jamoadoshi Joau Pedro yaxshiroq natija qayd etgan.
